Tuesday , July 5 2022
Breaking News
Home / உலகம் / கரூரில் பிரசித்தி பெற்ற தலமாக மாரியம்மன் கோவில் கம்பம் நடுதல் நிகழ்ச்சியுடன் கோவில் திருவிழா கோலாகலமாக தொடங்கியது.
Vsolve UK

கரூரில் பிரசித்தி பெற்ற தலமாக மாரியம்மன் கோவில் கம்பம் நடுதல் நிகழ்ச்சியுடன் கோவில் திருவிழா கோலாகலமாக தொடங்கியது.

கம்பம் நடுதல் நிகழ்ச்சியுடன் கரூர் மாரியம்மன் கோவில் திருவிழா கோலாகலமாக தொடங்கியது. இதில் திரளான பக்தர்கள் கலந்து கொண்டு சாமி தரிசனம் செய்தனர்.

கரூரில் பிரசித்தி பெற்ற தலமாக மாரியம்மன் கோவில் விளங்குகிறது. அம்மனின் சக்தி மீது பக்தர்கள் வைத்திருக்கும் நம்பிக்கைக்கு எல்லையே இல்லாமல் உள்ளது. அந்தவகையில் வேண்டும் வரம் தரும் அம்மனாகவே கரூர் மாரியம்மன் பக்தர்களுக்கு அருள்பாலிக்கிறார். இந்த கோவிலில் ஆண்டு தோறும் சித்திரை மாதம் கடைசியில் திருவிழா தொடங்கி வைகாசி மாதத்தில் முடிவடையும்.

இதையொட்டி கோவில் முன்பு கம்பம் நடப்பட்டு அதற்கு புனித நீர் ஊற்றி வழிபாடு செய்வதும், விழாவின் இறுதியில் அந்த கம்பத்தினை பக்தர்கள் வெள்ளத்தில் ஊர்வலமாக எடுத்து சென்று பசுபதிபாளையம் அமராவதி ஆற்றில் விடும் நிகழ்ச்சியும் முக்கியத்துவம் வாய்ந்ததாக இருக்கிறது. இந்த நிகழ்ச்சியின் போது மாவட்டம் முழுவதும் இருந்தும், பக்கத்து மாவட்டங்களிலும் இருந்தும் பக்தர்கள் அதிக அளவில் வருவது உண்டு.

கம்பத்திற்கு உற்சாக வரவேற்பு..
அந்த வகையில் இந்த ஆண்டுக்கான, கரூர் மாரியம்மன் கோவில் திருவிழா கம்பம் நடுதல் நிகழ்ச்சியுடன் நேற்று கோலாகலமாக தொடங்கியது. கம்பம் இருக்கும் இடத்தை கனவில் வந்து அம்மன் அசரிரீயாக அறிவுறுத்திய பிறகு, அங்கு சென்று மூன்று கிளையுடைய வேப்பமரத்திலிருந்து கம்பத்தை எடுத்து வருவது இந்த கோவிலின் தொன்று தொட்டு நடக்கும் ஐதீகமாக கருதப்படுகிறது.

அதன் அடிப்படையில் கோவிலுக்கு கம்பம் கொண்டு வந்து தரும் நிகழ்ச்சி கரூர் அருகேயுள்ள பாலம்மாள்புரத்தில் இருந்து தொடங்கியது. பரம்பரை பரம்பரையாக கம்பம் எடுத்துவரும் குடும்பத்தை சேர்ந்தவர்கள் 3 கிளையுடைய வேப்பமரகம்பத்தை எடுத்து பாலம்மாள்புரத்தில் உள்ள திடலில் வைத்து அந்த கம்பத்திற்கு புனிதநீர் ஊற்றி பூச்சூடி, கோவிலை நோக்கி ஊர்வலமாக புறப்பட்டனர். அப்போது கம்பத்திற்கு வரவேற்பு கொடுக்கும் விதமாக மேள தாளங்கள் முழங்கப்பட்டன.

புனிதநீர் குடங்களுடன் பக்தர்கள்
மேலும் பக்தர்கள் பலர் வழிநெடுகிலும் நின்று பூக்களை தூவி கம்பத்திற்கு வரவேற்பு அளித்தனர். பக்தர்களும் புனிதநீர் குடங்களுடன் கோவிலை நோக்கி சென்றனர். பசுபதிபாளையம் ஐந்துரோடு உள்ளிட்ட பகுதியில் பக்தர்கள் திரண்டு நின்று கம்பத்தை வணங்கினர். பின்னர் மாரியம்மன் கோவிலை அடைந்ததும் கம்பத்திற்கு சிறப்பு செய்யப்பட்டது. அப்போது பக்தர்கள் அருள்வந்து சாமியாடியதை காண முடிந்தது. பின்னர் கம்பம் கோவிலினுள் வைக்கப்பட்டு, மாலையில் ஆற்றுக்கு கொண்டு சென்று பூஜை செய்து நடுவதற்கான ஏற்பாடுகள் நடந்தன.

இதற்கிடையே கம்பம் கோவிலுக்கு எடுத்து வரப்பட்டதுடன் புனிதநீரை பக்தர்கள் அதன் மீது ஊற்றி வழிபட்டனர். பின்னர் கம்பு, கேழ்வரகு கூழ், நீர்மோர் ஆகியவை வழிநெடுகிலும் பக்தர்களுக்கு வழங்கப்பட்டது.

திருவிழா தொடக்கம்
அதன் பின்னர் மாலையில் கம்பமானது பசுபதிபாளையம் அமராவதி ஆற்றுக்கு கொண்டு செல்லப்பட்டு அலங்கரிக்கப்பட்டது. அப்போது வேப்பிலைகள், பூக்கள் உள்ளிட்டவற்றை கம்பத்திற்கு கட்டி பூஜை செய்து தீபாராதனை காட்டப்பட்டது. அதனை தொடர்ந்து மாலை சுமார் 6.30 மணியளவில் ஆற்றிலிருந்து கோவிலுக்கு கம்பம் புறப்பட்டது. இதனை காண பொதுமக்கள் பலர் ஆற்று பாலத்தின் மேல்பகுதியில் திரண்டிருந்தனர்.

மேலும் ஜவகர் பஜார் வீதி முழுவதும் மக்கள் வெள்ளம் அலைகடலென திரண்டிருந்த படி இருந்தது. மேளதாளங்கள் முழங்க கம்பம் பக்தர்கள் கூட்டத்தில் ஆடி அசைந்து வந்தது. பக்தர்கள் மல்லிகைபூ உள்ளிட்டவற்றை தூவியும், தாம்பூலத்தட்டில் வாழைப்பழம், தேங்காய் ஆகியவற்றை எடுத்து வந்து படைத்தும் வழிபாடு செய்தனர். பின்னர் அம்மனின் சன்னதி எதிரே கம்பம் நடப்பட்டு திருவிழா தொடங்கியது. நீண்ட வரிசையில் நின்று பக்தர்கள் அம்மனை தரிசனம் செய்து சென்றனர். கம்பம் நடும் நிகழ்ச்சியையொட்டி போலீசார் பாதுகாப்பு பணியில் ஈடுபட்டனர்.

Bala Trust

About Aruna Manoharan

Check Also

ஆப்கானிஸ்தானில் பெண் செய்தி வாசிப்பாளர்கள் முகத்தை மூடிக்கொள்ள வேண்டும் – தலீபான் உத்தரவு

பெண் செய்தி வாசிப்பாளர்கள் தொலைக்காட்சியில் செய்தி வாசிக்கும் போது தங்கள் முகத்தை மூடிக்கொள்ள வேண்டும் என தலீபான்கள் உத்தரவிட்டுள்ளனர். காபுல், …

இரத்தம் வேண்டுமா?
NKBB TECHNOLOGIES